Поликлиникада я дәваханәдә табибка керер алдыннан “автомат” савыттан 10 сумга бахил сатып алырга мәҗбүр итәләр. Шунсыз табибка үткәрмиләр. Ә законлымы соң ул бахилны сатып бирү? Мин кайдадыр алар бушлай бирелергә тиеш дип укыдым.

Илгиз.

Медицина хокукы үзәге җитәкчесе Андрей Карпенко бу уңайдан болай дип җавап бирә:
–Бахил өчен акча сорау, аеруча дәүләт муниципаль медицина оешмаларында, законсыз. Әгәр ниндидер кагыйдәләргә таянып, сездән бахил өчен акча таләп итәләр икән, тиешле кәгазьләрне, документларны күрсәтүләрен сорагыз. Бөтен хикмәт тә шунда – пациенттан бахил сатып алырга мәҗбүр итүче норматив документлар юк. Ә менә дәваханәгә үзегез белән алмаш аяк киеме, я үзегезнең бахилны алып килегез дип үтенергә мөмкиннәр. Бу бигрәк тә интенсив терапия бүлегенә, я операциядән соң авырулар яткан палатага кергәндә кирәк.
Тагын шунысы да бар – бахил “сатучы” автоматны еш кына дәваханә түгел, ә бу медучреждениедә автомат куелган урынны арендага алып торучы бөтенләй чит оешма урнаштыручан. Ягъни бахил сатудан кергән акчалар да сәламәтлек саклауга түгел, ә коммерсант кесәсенә кереп бара.

Минем пропискам Башкортстанның Ишембай шәһәрендә, ә үзем чит төбәктә яшим һәм эшлим. Баламны да шушында табарга ниятләдем. Ә бала пособиесен кайдан алырга була – прописка буенча Ишембайдамы әллә яшәгән чит төбәктәме?

А. Такиева.

– Бала туганда бер мәртәбә түләнә һәм бала караганда яшь тә алты айга кадәр ай саен түләнә торган пособиене сез эшләгән урыннан ала аласыз, чөнки бу түләүләр социаль страховкалау фонды аша килә, – ди БР Гаилә, хезмәт һәм халыкны социаль яклау министрлыгының матбугат сәркәтибе Роза Кузьменко. – Башка социаль ярдәм чаралары – әгәр яшь әнинең аларга хокукы булса – прописка буенча түләнә. Баланы үзебезнең республикада да, чит төбәктә дә, хәтта чит илдә дә табарга була.

Күптән түгел мин яшәгән йортның ишек алдында берәдәк эт үлде. Күршеләрнең берсе дә кайда шалтыратырга, бу хакта кемгә әйтергә кирәклеген белмәде. Этнең гәүдәсен кем һәм кайда алып китергә тиешләр? Мондый очракта нишләргә?


Илмир Әхмәдишин.
Уфа шәһәре.

“Үзегезнең идарә итүче компаниягезгә шалтыратырга кирәк, алар этнең гәүдәсен кремацияләү мәсьәләсен хәл итәргә тиешләр, чөнки закон буенча аны җирләргә ярамый, – дип аңлатты зоояклау үзәге белгече Светлана Ильинская. – Әгәр этнең котырган булуына шигегез бар икән, урындагы ветеринария станциясенә шалтыратыгыз. Алар һәрбер зур шәһәрдә бар. Ветеринарлар этнең гәүдәсен бушлай алып китәргә һәм куркыныч чирләренең барлыгын-юклыгын тикшерергә тиеш. Үлгән этнең гәүдәсен кремацияләү дә – станцияләр өстендә”.

Кемнәргә ташламалар каралган?
Башкортстан халкы 2019 елда барлыкка киләчәк каты коммуналь калдыклар белән эш итү буенча яңа хезмәт өчен түләүгә льготага исәп тота ала.