Рейтинг:  5 / 5

Звезда активнаЗвезда активнаЗвезда активнаЗвезда активнаЗвезда активна

 

Г.Куватов исемендәге республика клиник дәваханәсенең зур һәм тату коллективы яшь белгечләр – 6 табиб һәм 27 урта медицина хезмәткәре – белән тулыланды. Аларны кабул итү тантанасы 23 ноябрьдә дәваханәнең “Медик” мәдәният йортында үтте.

Сер түгел, һөнәр сайлау – зур һәм җитди адым. Медицина хезмәткәре исә – иң җаваплы һөнәрләрнең берсе, чөнки кайсыбер чакта кешенең сәламәтлеге генә түгел, ә гомере дә табиб һәм шәфкать туташының осталыгына бәйле. Шуңа медицина юлын сайлаган яшь белгечләргә тәҗрибәле табибларның киңәшләре дә – зур ярдәм. Бу уңайдан Республика клиник дәваханәсендә эшләүче остазлар яшьләргә үзләре белгәнне җиткерергә һәрвакыт әзер. Һөнәргә багышлау тантанасы исә тәҗрибәле табиблар белән яшь белгечләр арасындагы хезмәттәшлек җепләрен тагын да ныграк бәйләде.

Яңа эш башлап җибәрүчегә изге теләкләр белән дәваханәнең баш табибы – медицина фәннәре докторы, Русия Федерациясенең атказанган сәламәтлек саклау хезмәткәре, Башкортстан Республикасының атказанган табибы Ринат Җәүдәт улы Нагаев чыгыш ясады.

Яшь белгечләр тантаналы рәвештә ант бирделәр. Соңыннан дәваханәнең баш шәфкать туташы Айгөл Әнгам кызы Кәшфетдинова аларга истәлекле бүләкләр тапшырды.

Бүген җитди дә, җаваплы да хезмәт юлын башлаучылар, биргән антларына тугры калып, киләчәктә һәрберсе үз эшенең остасы булыр дигән өметтә калабыз.

Язгөл САФИНА.

Фотода тантанадан күренешләр.