Башкортстан башлыгы вазифасын башкаручы Радий Хәбиров исеменә социаль челтәрләр аша килгән мөрәҗәгатьләр арасында "Илеш районының Кызыл Байрак авылында кибет юк" дигән сорау бар. Илеш районы хакимияте “2018 елның апрелендә Башкортстан Республикасының Сәүдә һәм кулланучылар хокукларын яклау буенча дәүләт комитетына күчмә сәүдә оештыру өчен “Газель” машинасы нигезендә автокибет бүлү турында заявка бирдек” дип җавап биргән.

Әлеге җавапка Башкортстан Республикасының Сәүдә һәм кулланучылар хокукларын яклау буенча дәүләт комитетыннан ачыклык керттеләр. “2017 елда 10 автолавка алу өчен бюджеттан акчалар бүленде. Алар сәүдә хезмәтләндерүе проблемасы кискен торган еракта урнашкан һәм барып җитүе авыр булган авылларга юнәлтелде.

Әлеге эшне дәвам итү максатында 2018 елда Сәүдә комитеты автокибетләр сатып алу өчен бюджеттан өстәмә акчалар бүлү турындагы сорау белән Башкортстан Хөкүмәтенә мөрәҗәгать итте. Акчалар бүленмәде.

Алдагы елдан эшне яңадан тергезергә планлаштырабыз. Район хакимиятләреннән, шул исәптән Илештән дә заявкалар бар”.

 

“Радий Фәрит улы! Ишетегез безне, зинһар” дип башланган хатлар Башкортстан башлыгы вазифасын башкаручы Радий Хәбиров исеменә күпләп килә. Шундый хатларның берсен Чишмә районыннан Рәзилә Хәмзина язган.

“Без Келәш авылында балалар бакчасы ачуларын сораган идек. Безгә ярдәм итәләр, әмма моның өчен мәктәпнең 2 сыйныфын алып, аны балалар бакчасына әйләндермәкчеләр. Ә укучыларны нәрсә эшләтәләр дигәнгә, икенче сменада укыячаклар, диделәр. Авыл җирендә икенче сменада укуны ничек күз алдына китерергә, өстәвенә, алар бит башлангыч сыйныф укучылары?

Аек акыл белән фикер йөртсәк, класс бүлмәләрен балалар бакчасына үзгәртеп кору өчен дә ярыйсы чыгымнар кирәк. Мәктәпкә яңа янкорма төзү яхшырак булмас идеме икән? Мәктәп яны участогы зур, урын җитәрлек. Мәктәпкә дә хилафлык килмәс иде, балалар бакчасы да булыр иде.

Әле безнең авылда кызу бәхәс бара: кемгәдер – мәктәп, кемгәдер балалар бакчасы кирәк. Бу мәктәпне Мостай Кәрим салдырган иде һәм без аның бөеклеген үзгәртергә теләмибез.

Мостай Кәрим исемендәге мәктәпне саклап калу һәм балалар бакчасы төзү буенча мөмкин булган вариантларны каравыгызны сорыйбыз. Әмма мәктәп исәбеннән түгел! Чөнки балалар бакчасына йөргән балалар шушы мәктәпкә барачаклар”.  

 

“Башкортстанның Мәгариф министрлыгы мәгариф объектларын яңадан төзү, реконструкцияләү һәм капиталь ремонтлау кирәклеген исәпкә алып, мәгариф объектлары белән тәэмин ителү исемлеген булдыру буенча сорау җибәрде. Чишмә районыннан 19.09.2018 елда килгән заявкада Келәш авылында балалар бакчасы төзүне дәлилләгән ихтыяҗ юк, – диелә Мәгариф министрлыгының капиталь ремонт, матди-техник базаны үстерү бүлеге җитәкчесе Тимур Солтановның җавабында.

– Шулай ук Чишмә районының мәгариф идарәсе биргән мәгълүмат буенча, Келәш авылында М.Кәрим исемендәге урта белем бирү мәктәбе урнашкан. Мәктәпнең проект куәте 192 укучыга исәпләнгән. 2018-2019 уку елында мәктәптә 1нче сыйныфтан 11 сыйныфка кадәр 122 бала белем ала. Бер сыйныфка уртача 11 укучы туры килә. Мәктәптә барлыгы 13 укыту бүлмәсе бар. Аларның 11ендә дәресләр даими алып барыла. Шул рәвешле, 2 бүлмәне мәктәпкәчә төркем өчен 1 бүлмәгә үзгәртергә мөмкин. Бу икенче сменада укуга китермәячәк. Мәктәпне ябу яки исемен үзгәртү мәсьәләсе каралмый”.

Башкортстан башлыгы вазифасын башкаручы Радий Хәбиров адресына килгән мөрәҗәгатьләр белән таныштыруны дәвам итеп, киләсе хатка тукталабыз. Аны Вконтакте социаль челтәрендә Ksushka Gorb исеме белән теркәлүче язган.

“Исәнмесез, Радий Фәрит улы! Мин Башкорт республика мәдәният һәм сәнгать көллиятенең элекке студентымын. Зинһар, студентларга ярдәм итегез. Колледжта тәртипсезлек хөкем сөрә!

Бу хәлләр 2017 елда көллият бинасыз торып калгач башланды. Бина авария хәлендә дип танылды һәм шуннан башлап студентлар тулай торакта шөгыльләнергә мәҗбүр. 2-3 кеше яши торган бүлмәләргә парталар куйдылар һәм теоретик лекцияләр шунда укытыла. Ә практик махсус дәресләр (актерлык сәләте, хореография һәм башкалар) өчен преподавательләр бар шәһәр буйлап бина эзләргә мәҗбүр. Көллият директорының җавабы бер –  “түзәргә кирәк”.

Без үзебез укыган вакытта мондый шартларга озак түзә алмый бар инстанцияләргә яза башладык. Башта йогынтысы булды: шәһәр хакимияте элекке Технология колледжы бинасын бирде. Ә 2018 елның октябре тирәләренә яңа зур бинага күчәчәксез, диделәр. Әмма бүгенге көнгә бу бинаның түбәсе генә ремонтланган.

Әлеге вакытта укулар үткәрелгән тулай торак та авария хәлендә: түбәдән тама, бар җирдә гөмбәчекләр, күгәрекләр... Тикшерүләр үткәреп торалар, ләкин ниндидер бер серле рәвештә барысы да яхшы булып чыга.

Зинһар, ярдәм итегез!!!  Бу көллият – мәдәният белгечләре әзерли торган якын тирәдәге бердәнбер уку йорты. Мәдәни тормышка зур өлеш керткән преподавательләр дә җәфалана. Аларның күбесе – Башкортстан Республикасының һәм Русия Федерациясенең атказанган мәдәният хезмәткәрләре”. 

 

“Башкорт республика мәдәният һәм сәнгать көллиятенә ясалган капиталь ремонтны Башкортстанның Мәдәният министрлыгы аерым контрольдә тота, –  диелә җавап хатында. – Бинаның түбәсен капиталь ремонтлау буенча планлаштырылган эшләр бүгенге көнгә тулы күләмдә башкарылган. Бинаны капиталь ремонтлау буенча әзерләнгән проект-смета документациясе республиканың Дәүләт экспертизасы идарәсендә тикшерү үтә. Декабрь аенда уңай нәтиҗә килер дип көтелә.

Бинаны капиталь ремонтлау буенча төзелеш-монтаж эшләре 2019 елга планлаштырылган. Эшләр тәмамлану белән студентлар һәм преподавательләр уңайлы шартларда шөгыльләнә алачак.

Бүгенге көндә көллиятнең укыту эшчәнлеге туктатылмады. Ремонт эшләре тәмамланганчы дәресләр Стәрлетамак дәүләт театр-концерт берләшмәсе, Башкортстан республикасының мәдәни мирасы объектларын дәүләт саклавы буенча идарә, Стәрлетамак шәһәренең үзәк китапханәләр системасы , “Ана һәм бала” хәйрия фонды, “Лидер” театраль студиясе һәм колледжның тулай торагы биналарында алып барыла”.

 

Башкортстан башлыгы вазифасын башкаручы Радий Хәбиров исеменә социаль челтәрләр аша мөрәҗәгатьләр бик күп килә. Түбәндәге сорау авторы – Айгөл Гыйләҗева.

“Гаиләләргә, авырлы хатыннарга, аналар һәм балаларга ярдәм итүче нинди республика, президент программалары, пособиеләр бар ул? Социаль ярдәм күрсәтүче хезмәтләрдә аңлатып сөйләмиләр. Бу хакта кайдан мәгълүмат яки киңәш алырга була? Мөмкин булса, сылтама бирә аласызмы? Алдан ук рәхмәт!”

 

“Башкортстан Республикасында социаль ярдәмнең 70тән артык төре күрсәтелә. Шул исәптән балалары булган гаиләләргә дә ярдәм каралган, – дип җавап бирә Башкортстан Республикасының Гаилә, хезмәт һәм халыкны социаль яклау министрлыгы матбугат хезмәткәре Роза Кузьменко. – Гражданнарга уңайлы булсын өчен 2 ел элек Башкортстан Республикасының Гаилә, хезмәт һәм халыкны социаль яклау министрлыгы сайтында “Балалары булган гаиләләргә дәүләт ярдәме” дигән махсус бүлек булдырылды. Аның адресы: http://mintrudrb.ru/payments/family_with_children/.

Анда гаиләләргә ярдәм итүгә юнәлтелгән республика чараларының барысы да гаиләдәге балалар санын исәпкә алып язылган. Шунысы да мөһим: әлеге бүлектә Гаилә һәм хезмәт министрлыгы гына түгел, ә башка министрлыклар һәм ведомстволар тарафыннан да бирелүче пособие, түләүләр һәм компенсацияләр турында мәгълүмат бар.

Монан тыш, 1 ел элек Министрлык интерактив онлайн киңәш бирү мөмкинлеге булдырды: http://calc.rcspn.mintrudrb.ru/adviser/Default.aspx. Аның ярдәмендә өйдән чыкмый гына нинди социаль ярдәм чараларына дәгъвa итәргә мөмкин икәнлеген билгеләргә була. Анкета тутырганнан соң, онлайн-консультант сезнең һәм гаилә әгъзаларыгызның ташлама алучыларның кайсы категориясенә каравын исәпләп чыгара”.

 

Фото: Интернет.

 

Башкортстан Башлыгы вазифасын вакытлыча башкаручы Радий Хәбировка Лена Ибраһимова түбәндәге сорау белән мөрәҗәгать итте.

Исәнмесез! Ни өчен быел яшь гаиләләрне торак белән тәэмин итү программасы буенча сертификатлар бирү тоткарланды? Аларны арытабан да бирәчәкләрме? Күпләр сертификатны алу буенча чиратта унар ел тора. Ә кемнәрдер, документны вакытында ала алмау сәбәпле, программадан бөтенләй “чыгып очтылар”...