Беренче каналдагы “Сегодня вечером” тапшыруы 90 еллар йолдызларына багышланган иде. Чакырылган кунаклар арасында Уфадан Андрей Губин да булды. “Мальчик-бродяга” көнкүреше хакында һәм  үзенә карата артык игътибарны яратмавын сөйләде.

Фанатларың сине урамда таныймы дигән сорауга Губин  “төрле хәлләр була, таныйлар да, әмма берсе дә муеныма ташланмый” диде.

  • Әлеге вакытта Уфада яшим. Әлбәттә бөтен Уфа Губинның кайда йөргәнен белә. Кибеткә барып җиткәнче 2-3 фотога төшәм, кире кайтканда – шулай ук. Ләкин шулай да плакатлар тотып басып тормыйлар, минем плакатларым хәтта үземдә дә юк”, - ди Андрей.

Билгеле җырчы игътибар җитмәүгә зарланмый.

  • Теләсә кайда күп игътибар итәләр, кайчагында бик ямьсез формада, чит илдә дә, мәсәлән. Биредә үземне тыныч тотарга вәгъдә бирдем, ә чынында исә усал гына итеп әйтәсе дә килә, - диде ул.

Студиядәге тамашачыларның дәррәү кул чабуына Губинның йөзләре үзгәреп китте, нигә шулкадәр еш һәм нык кул чабасыз, имеш.

Андрей Губин Уфа буйлап беруши киеп йөрүен әйтте.

— Якындагы “Магнит” кибетендәге барлык сатучылар белән дә танышып беттем. Искитмәле. Мин беруши киям. Бермәл сатучы белән сөйләшеп торганда берушины югалттым. Алар миңа табып бирде, - дип уртаклаша җырчы.

Авырулары турында да әйтте Губин.

  • Публикага бик тә чыгар идем. Ләкин мин физик яктан начар формада, шуңа үземне артык күрсәтергә тырышмыйм. Иртәдән кичкә кадәр авырыйм мин. Шуңа фотога төшәргә, съемкаларда катнашырга яратмыйм. Кайчагында имеш-мимешләрне кире кагар өчен генә күренгәлим. Бу-читләшү түгел. Бу бары тик сызлануларны җиңәргә тырышу гына. Табиблар күптән миңа кул селтәде. Ләкин Андрюша тиз генә бирешми ул.

Тапшыруда күрсәтелгән элекке клипларын Губин күңелсез генә  күзәтә.

“Яңа җырлар язасыңмы?” дигән сорауга башкаручы үзен тәнкыйтьләп болай диде:

  • Кайтам да нидер җырлап карыйм, ләкин әллә ничек яңгыравын сизеп торам. Аннары спорт белән шөгыльләнәм.

Алып баручылар Андрей Губинның яшь күренүен мактап телгә алды.

  • 30да 15 яшьлек кебек күренсәң, бүген сиңа нибары 30ны биреп була, - диде алар.

Ахырда Губин үзен объектив бәяләвен һәм клипларындагы теге кешене (ягъни үзен) һаман да яратуын әйтте.

ufa1.ru

 

Кырым республикасы башлыгы Сергей Аксенов, Сибай халкының төтеннән интеккәнен ишеткәч, 500 баланы үзләренә ял итәргә һәм сәламәтлекләрен ныгытырга чакырган.

“Сибайда карьер пыскуын белгәч, ул шәһәрнең 500 баласын Кырымга бушлай ял итәргә, күкерт исе булмаган һава суларга чакырды. Моның өчен аңа зур рәхмәт! – дип язды Сергей Аксеновның тәкъдиме турында Башкортстан җитәкчесе Радий Хәбиров үзенең Вконтактедагы битендә. – Ә безнең бурыч булып иң якын арада сибайлыларны уңайсыз хәлдән азат итү кала”.

Әйткәндәй, бу көннәрдә Кырымның рәсми делегациясе эш сәфәре белән Башкортстанда.

Быел Башкортстанда  8 һәм аннан да күбрәк  бала тәрбияләүче гаиләләр   600 мең сум күләмендәге түләү алачаклар. Бу ярдәм 47 гаиләгә биреләчәк.

2015 елдан алып мондый ярдәмне безнең республикада 9 һәм аннан да күбрәк балалы  28 гаилә алды. Быелдан яңалык кертелде: әлеге түләү 8 бала тәрбияләүче гаиләләргә дә бирелә башлый.

Фото: Интернет.

Уфаның бер чүп мәйданы янында искиткеч хәл булган. Бер төркем халык чүп савытларында чокынган. Карап торуга урам берәдәкләре түгел, начар киенмәгәннәр, гадәти халык. Бу хәлнең шаһиты социаль челтәрдә хәбәр урнаштырган.

Бак дисәң, башкаланың бер зур сәүдә кибете яраклылык срогы чыккан ризыкларны гадәти чүп савытына ыргыткан. Моны күргән кешеләр, бер-берсен этешә-төртешә сумкаларына әлеге ризыкларны тутыра башлаган.

 

Фото: социаль челтәрдән.

 

Стәрлетамакта Ленин проспекты 34а йортында яшәүчеләрнең  краннарыннан зәңгәр су ага башлаган.  Сыекчаның төсе гаҗәеп, кыйммәтле курортлардагы диңгез төсен хәтерләтә. Тутыклы су акса бер дә аптырарлык булмас иде, әмма диңгез төсендәге су стәрлетамаклыларда төрле реакция тудырды. Автомобиль хуҗалары краннан “незамерзайка” я тосол ага дип тә уйлады. Һәрхәлдә, төсе буенча бу сыекчалар охшаш, җитмәсә краннан акканы күбекләнә дә әле.

Видеоны шундук социаль челтәрләргә салдылар. Баксаң, мондый проблема Ленин проспекты 34а адресы буенча гына түгел, тагы берничә күпкатлы йортта күзәтелә икән. Җирле идарә компаниясе хезмәткәрләре оператив рәвештә мәсьәләне контрольгә алган, су белән тәэмин итүче оешмага бу хәлне тикшерү кирәклеген сорап хат язганнар.

Әле стәрлетамаклылар су белән тәэмин итүче оешмадан җавап көтә.

bash.news