31 октябрь—1 ноябрь көннәрендә Мәскәүдә чит илләрдә яшәүче ватандашларыбызның VI Бөтендөнья конгрессы үтте. Ике көнлек чарада 98 илдән 400дән артык ватандашыбыз катнашты. Пленар сессиядә Русия президенты Владимир Путин, чит ил эшләре министры Сергей Лавров чыгыш ясады.

         Конгресс эшендә катнашучылар ватандашларның хокукларын яклау, рус теле һәм мәдәниятен саклау һ.б. мәсьәләләр буенча киңәш кордылар.

         Владимир Путин үзенең чыгышында рус дөньясының рухи бәйләнешләрен өзәргә тырышулардан сак булырга чакырды.  “Без чит илләрдә яшәүче ватандашларыбызның үзләренең рус халкы вәкиле булуларын, туган ил белән элемтәләрен өзмәүләре белән кызыксынабыз”,— дип белдерде. Ул шулай ук Русия башка илләрдә яшәүче ватандашларыбызның хокукларын яклауны үзенең бурычы итеп саный дип белдерде.

         В.Путин съездда катнашучыларга чит илләрдә яшәүче ватандашлар өчен  Русия гражданлыгын алу процедурасының гадиләштерелүе турында җиткерде. Бу җәһәттән президент 2019-2025 елларга РФ Дәүләт миграция сәясәте концепциясенең яңа редакциясенә кул куйды да инде. Димәк, хәзер читтә яшәүче ватандашларыбыз өчен киртәләр бетерелде.

        Соңгы 12 ел эчендә Русиягә 800 мең ватандашыбыз кайткан. В.Путин белдерүенчә, туган илгә кайтырга теләүчеләр саны елдан-ел арта. Дәүләт аларга адаптация үтү процессын җиңелләштерү эшен дәвам итүне ышандыра.