Төрекмәнстанның Дашогуз өлкәсенең авыл хуҗалыгы тармагы уку йортларына һәм оешмалары хезмәткәрләренә тимер-томыр җыярга кушканнар. Аларның һәркайсы 200 килограмм тимер-томыр җыеп, дәүләт металлургия заводына тапшырырга тиеш.

        Хәзер исә анда укытучылар дәресләрдән буш вакытларын тимер-томыр эзләп, җыеп үткәрәләр икән. Аларның кайберләре бу эшкә укучыларны да җәлеп итә башлаган.

        Авыл хуҗалыгы тармагында эшләүчеләр үзләренә салынган планны үтәү өчен искергән, әмма эшкә яраклы булган авыл хуҗалыгы техникаларын сүтә башлаган.

        Ә 1 сентябрьдә Төрекмәнстан халкының 2019 елның 1 гыйнварыннан электр энергиясе, газ, эчәргә яраклы су һәм тозны бушка алудан мәхрүм ителәчәге турында хәбәр ителгән иде. Ил президенты Гурбангулы Бердымөхәммәтов кул куйган карарда бу адымга баруның Төрекмәнстан икътисадында ирекле базар мөнәсәбәтләрен дәвам итү һәм шулай ук электр энергиясе, газ, торак-коммуналь хезмәтләр бәяләрен тәртипкә китерү өчен кирәклеге турында әйтелә.