Рейтинг:  0 / 5

Звезда не активнаЗвезда не активнаЗвезда не активнаЗвезда не активнаЗвезда не активна
 

“Өмет”нең узган елдагы 50нче санында “Ялымны боздылар” дигән язма дөнья күргән иде.

“Алло, “Өмет” тыңлый” рубрикасына килгән хатта Яңавыл шәһәреннән Камәрия Гарифҗан кызы Хөснетдинова “Йоматау” шифаханәсенә ташламалы юллама белән баргач, күрсәтелгән хезмәтләрнең күбесенең сыйфатсыз булуына, дорфалыкка күңеле әрнеп, төшенкелеккә калып кайтуы турында бәян иткән иде. Шунда ук шифаханә җитәкчелегенең җавабы да урын алды. “Өмет” укучылар әлеге язмага битараф калмады. Илеш районы Рсай авылыннан Әхмәдуллина-Сакаева В. (кызганычка, исемен язмаган) апа да үз фикерләре белән уртаклаша. Аның хатын тәкъдим итәбез.

“Өметләнеп ераклардан килгән ветеранны мыскыл итеп, дежурный бүлмә бирүләре бер генә дә матур күренеш түгел инде. Элек бу санаторийны бик мактыйлар иде бит. Минем сугышта катнашкан картыма колхоз гел бушлай юллама бирә иде. Ял итеп кайткач, картым бик мактый иде. Үзе 90 яшьтә дөнья куйды. Соңгы елларда шифаханәдә дәваланучыларга шундый мөнәсәбәт булса, бик аяныч инде.
Икенчедән, “бушның атасы-инәсе үлгән” дигән сүзләрне бүген еш ишетәбез шул. Автор бик дөрес язган, ничек бар, шулай язган. Хезмәткәрләр тиешле җәзаларын алырлар дип өметләнеп язгандыр. Әмма “карга күзен карга чукымый” дигән сүзләр дә бар бит әле.
Менә шунда өч стакан су эчәр өчен Уфаларга бару кирәк микән? Ходай биргән нигъмәтләрне кулланырга кирәк, минемчә. Саф һавада йөрегез. Һава әле сатылмаган. Урманнарга чыгыгыз, чәчәкләр җыегыз, чәчәк ванналары ясап керегез. Кымыз ясаучылар күп. Сатып алыгыз да эчегез. Шифалы үләннәр җыеп, ингаляция ясагыз. Әйтер сүзем шул: үзеңне үзең кара, йөрәккә булсын дәва. Дөньяны басты комсыз Алабай, ә син үзеңчә яшә, бернәрсәгә карамый.
90 яшькә җиттем. 40 ел стажым бар. Бер көн санаторий күрмәдем, “досрочно” үлмәдем, дип шаяртып, күңелегезне күтәреп җибәрүче
Әхмәдуллина-Сакаева.
Илеш, Рсай”.