Рейтинг:  0 / 5

Звезда не активнаЗвезда не активнаЗвезда не активнаЗвезда не активнаЗвезда не активна
 

Башкалабызның Урманчылар паркында журналистлар аллеясенә нигез салынды. “Өмет” журналистлары да анда үз агачын утыртты.

Һәр ир-егеткә үз гомерендә кимендә бер агач утырту мотлак. Чөнки фани дөньяда яшәгән һәр кешенең үзеннән соң җирдә якты эзе калырга тиеш. Ә агач – ул гасырлар буе яши. Ә инде агачны бергәләп утыртсаң, тагы да саваплырак.

 

Бергәләп агач утырту гаиләне генә түгел, җәмгыятьне берләштерә, буыннар күчүчәнлеген тәэмин итә.
Уйлап кына карыйк, без үзебезнең бакчаларда, шәһәр һәм авыл аллеяләрендә, паркларда, урманнарда кайчандыр гомер иткән, инде күптән мәрхүм булган ата-бабаларыбыз утырткан агачларга карап куанабыз, алар күләгәсендә ял итәбез һәм үзебез дә агачлар утырту традицисен дәвам итеп, балаларыбызга матур үрнәк күрсәтәбез.
Русия урман хуҗалыгының ел саен игълан иткән “Яшә, урман!” бөтенрусия акциясенә Русия Федерациясенең бөтен төбәкләре кушыла. Аның мәгънәсе һәм төп максаты – үсеп килгән буынга экологик белем бирү һәм агач утырту, урман үстерү һәм биләмәләрне төзекләндерү буенча эш алып бару.
Акцияне безнең Башкортстанда да күтәреп алалар, ел саен төрле оешма һәм предприятиеләр аңа теләп кушыла. Менә бу атнада, мәсәлән, Башкортстанның гәзит-журнал, телевидение һәм радио хезмәткәрләре Урманчылар паркында Журналистлар аллеясенә нигез салды. “Үз агачыңны утырт” дип исемләнгән бу акция чикләрендә махсус сайланган мәйданда 40 төп тирәк агачы утыртылды. “Өмет” гәзите хезмәткәрләре дә анда үз агачын утыртты.

– Әлеге акция журналистларның халыкара теләктәшлек көнен уздыру белән бәйле үтә, шуңа да без анда катнашырга теләк белдердек, – ди бу уңайдан Башкортстан Журналистлар союзы рәисе Артур Дәүләтбәков.- Һәрбер агач янына такта куелачак.
БР Урман хуҗалыгы министры урынбасары Салават Бәхтияров исә киләчәктә дә акцияне даими уздыру планлаштырыла дип белдерде.

 

P.S.: Башкортстан акциядә даими катнаша дидек. Былтыр анда 15 мең кеше үз өлешен кертте. Быел “Волонтерлар елы” игълан ителүен исәпкә алып, катнашучылар саны тагын да артыр дип ышанабыз.

Гөлара Арсланова.