Рейтинг:  0 / 5

Звезда не активнаЗвезда не активнаЗвезда не активнаЗвезда не активнаЗвезда не активна
 

Нуриман районының Иске Күл авылында социаль-мәдәни үзәк ачылды

2019 елда Башкортстан Республикасы үзенең 100 еллык юбилеен билгеләячәк.

Тарихка күз салсак, 1919 елның 3 мартында Русиядә беренче милли автомономия – Башкорт Автоном Совет Республикасы барлыкка килә. 1990 елның 11 октябрендә республика оештырыла, 1992 елның февралендә исә аңа Башкортстан Республикасы дигән исем бирәләр.


Быел июль аенда РФ Президенты Владимир Путин Башкортстанның 100 еллыгын рәсми рәвештә үткәрү турында карарга кул куйды. Бу дата бәйрәм үткәрү өчен генә түгел, республика өчен мөһим эшләр башкарырга да сәбәп булды.
Башкортстанның туган көненә республика Башлыгы Рөстәм Хәмитов 100 объект төзү турында карар чыгарды. Юбилейга һәр
районда бер объект барлыкка килергә тиеш. Исемлектә 41 белем бирү, 19 физик культура, 14 мәдәни, 11 сәламәтлек объекты бар, шулай ук коммуналь хуҗалыгы һәм торак өлкәсендә дә объектлар төзүне планлаштырганнар.
Юбилей чараларына әзерләнү һәм оештыру комитеты киңәшмәсендә республика Башлыгы хакимияте җитәкчесе Евгений Маврин юбилей объектларына – мәктәп, спорт корылмаларына – бренд, үзенчәлекле билге бирергә тәкъдим итте. Аның белән республика Башлыгы Рөстәм Хәмитов та килеште.
Бүгенге көндә 20 юбилей объекты сафка кертелгән, 50се төзелү стадиясендә.
Күптән түгел “100 еллыкка 100 объект” проекты кысаларында Нуриман районының Иске Күл авылында социаль-мәдәни үзәк ачылу тантанасы булды. Тантанага район хакимияте башлыгы Азамат Нусратуллин, Башкортстан Республикасы Башлыгы Хакимиятенең иҗтимагый-сәяси үсеш буенча идарәлеге начальнигы урынбасары Ришат Сабитов, БР Мәдәният министры урынбасары Ранис Алтынбаев, авыл халкы килгән иде.
Азамат Ризван улы авыл халкын бу көтелгән бәйрәмнәре белән ихлас котлап, социаль-мәдәни үзәккә сәхнә костюмнары сатып алырга 200 мең сумлык сертификат бүләк итте.
– Бу социаль-мәдәни үзәк киләчәктә яңа йолдызар кабызырга, яңа талантлар ачарга ярдәм итәр, яңа Кәримовалар, яңа Гайнан Хәйриләр тәрбияләнер дип ышанасы килә, халкыбызның матур йолаларын тергезегез, – дип теләде Ришат Хаҗгали улы Сабитов.
Мәдәният министры урынбасары Ранис Алтынбаев әйтүенчә, күптән түгел мондый социаль-мәдәни үзәк Илеш районының Иске Күктау авылында да ачылган.
– 2020 елда бөтендөнья фольклориадасы үтәчәк, шушы залдан килеп берәр солист та чыгыш ясар дип ышанам. Чөнки Нуриман районы бай мәдәни мирасы белән дан тота, быел алар Курган өлкәсендә үткән Русия сабантуенда республика исеменнән бик матур итеп чыгыш ясадылар. Алар, шулай ук, республикада башкорт халкының гореф-гадәтләрен күрсәтүче “Кәккүк чәе” исемле чаралары белән танылдылар. Киләчәктә дә зур уңышлар яуларсыз дип ышанабыз, – диде ул үзенең чыгышында.
2017 елның маенда Иске Күл авылы мәдәният йорты бинасы авария хәлендә дип табылган һәм аны сүтәргә дип карар иткәннәр. Бүген инде авылда яңа, заманча социаль объект сафка керде. Аның эчендә китапханә, фельдшер-акушер пункты, мәдәният йорты бар. Төзелеш өчен республика казнасыннан 46 млн. сум акча бүленгән. 90 урынга исәпләнгән мәдәният йортын ярты ел дигәндә төзеп куйганнар.
Рәсми өлеш тәмамлангач, килгән кунаклар яңа мәдәният йортына юнәлде. “Гөлнәзирә” фольклор ансамбленең һәр чыгышы алкышларга күмелде. Мәдәният йорты курай, гармун моңнарына күмелде. Ничек сагындырган икән шушы моңнар!
Ансамбльнең җитәкчесе Резида Нуриманова әйтүенчә, коллектив ике ел элек тупланган. “Район гәзитендә 5 яшьлек бер кызның чирләве һәм аны дәвалау өчен акча җыюлары турында язма күреп калдым. Хатын-кызлар җыелыштык та үзебезнең коллективны төзеп, 4-5 авылда чыгыш ясарга булдык. Концертлардан кергән 7 мең сум акчаны шул баланы дәвалау өчен тапшырдык”, – дип бәян итте ул.
Шуннан бирле коллектив һәр керемен хәйрия фондларына күчереп бара икән. Костюмнар сатып алмыйлар, аларны әти-әниләре өйрәткәнчә үзләре тегәләр. Гореф-гадәтләр дә саклана, акча да янда кала.
Мәдәният йортын яшь һәм талантлы Раян Бикмөхәммәтов җитәкли. Үзе кураенда да, баянында да уйный.
Ул көн авыл халкы өчен чын бәйрәмгә әверелде. “Яшьләр гореф-гадәтләребезне, милли көйләребезне онытмасын иде”, – дип теләделәр барсы да.

 

 

Эльвира Әсәдуллина.
Cергей Чудаков
фотосурәтләре.